GRUPO sa mga off roaders nga nagikan sa lain-laing probinsya ug siyudad sa Pilipinas nagkatigom alang sa labing unang Mindanao Overland Expedition (MOX) nga usa sa exciting nga kalihokan sa Kuyamis Festival 2020.

Ang Team CdO 4x4 Club maoy host sa tanang expeditioner team gikan sa Cebu, Davao, Pampanga, Iligan, ug Bukidnon kung asa 82 ka mga tag-as nga sakyanan ang nakarehistro nga maoy mag-trail sa bukid nga bahin sa lalawigan.

Ang event organizer niini nga mao si Ronelio R. Estillore niingon nga dili lang off road adventure ug off road thrills ang tumong sa ilang pagsuroy sa MisOr apan pagtunol og tabang sa mga lumad sa lalawigan nga dili kaayo gakaabtan og tabang.

Sa unang adlaw sa trail kung diin ang starting point nagsugod sa Seven Seas sa lungsod sa Opol Misamis Oriental paingon sa bukid sa Opol, El Salvador, Alubijid, Laguindingan, Gitagum ug niabot sa lungsod sa Initao kung asa sa bukid sa Sinalac sa lungsod sa Initao ilang gihapit ang ayuda sama sa sinako nga bugas, de lata, mga bangko ug uban pa alang sa tribung Higaunon.

“Actually ang first day among gibuhat more on easy pa kay para ma reach namo deretso ang mga tribes, maabot namo ang destination ma-intact tanan naa sa second day ang hard ug hopefully mag-ulan para feel namo ang 4x4,” butyag niini.

Tinguha sa grupo nga suportahan ang katawhan sa hinterlands labina ang mga lumad.

“We always supports the hinterlands side, kung unsa man to among naagian nakita just be a natural we are supporting the beauty of nature amo lang to support all out sa Lumad, Muslim and Christian sa bukid,” butyag ni Estillore.

Taliwala paman nga dili adventure alang kanila ang mga sementadong dalan gumikan kay daw makahilis kini sa ilang mga ligid apan suportado kini kaayo nila kay ang makabenipisyo man niini ang mga lumad ug residente sa kabukiran.

“Pasalamat gihapon mi sa mga development nga among naagian dinhi para sa nagpuyo para sayon pagpanaog nila sa ilang prudokto, but the other side naa pa unta ma witness nga angayan nga preserbahon,” butyag niini.

Ang SunStar Superbalita Cagayan de Oro lamang ang nag-inusarang sakop sa media nga miuban sa trail ug usa kini ka talagsaon kaayo nga ekperyensa. Makahugot ginhawa ang mga likoun, bukiron, batoon nga naagian apan mapasalamaton nga luwas gihapon nga niabot sa destinasyon.

Ang presidente sa Team CdO 4x4 Club nga si Richard Caucus niingon sa interbyu sa SunStar Superbalita nga kinaham kaayo nila nga mag-ulan ug dili sementado ang dalan aron mas gwapo ang off road adventures. Gipaabot sab nila ang ilang pasalamat sa Provincial Government pangunahan ni Misamis Oriental Governor Bambi Emano nga suportado niini ang ilang kalihokan labina gyod ang paglibot sa lalawigan aron sab sila magiyahan sa mga lumad nga maabtan nila og tabang.

Human sa ilang malampuson nga expedition laumang dili lang sa matag Kuyamis Festival magbalik balik sa Misamis Oriental ang nagkalain laing team apan karong umaabot bulan sa Oktubre kon diin adunay dakong international expedition kung hain ilang libuton ang Mindanao nga moabot og 1,000 kilometro kung asa ilang sugdan sa bukid nga bahin sa este ug weste sa Misamis Oriental, Iligan, Bukidnon ug Butuan.

Sa iyang bahin gipaabot ni Governor Emano ang iyang pasalamat sa tanang bisita gikan sa nagkalain laing probinsya sa nasod sa Pilipinas nga nilakip sa trail.

Bout lamang niini ipaabot nga sa ilang paglibot sa malinawon nga lalawigan, adunay mobubo nga mga investor ug lakip sa iyang gihangyo nga unta kadtong nakatunob kanila sa Misamis Oriental ilang ipanultian nga ang lalawigan daghan og tourism attraction nga pwedeng masuroyan ug maabi-abihon nga katawhan.