USA ang patay samtang usa ang samdan sa pagpamusil mga alas 12:10 sa udto sa Huwebes, Septiyembre 15, 2022 sa Purok Sandayong, Brgy. San Roque, lungsod sa Liloan, amihanang Sugbo.

Ang biktima nga namatay diha-diha tungod sa mga samad giilang si Arnel Matugas Roble, 40, drayber sa trak nga tig-deliver og butane canister, taga Purok 4, Binaliw, Danao City.

Naangol ang iyang truck helper apan wa pa nakuha sa kapulisan ang ngan niini kay daling gidala sa ospital.

Matod ni Police Staff Sergeant Nelson Sadile nga padung sila si Roble sa planta nga gipanag-iya ni Norman Gecali sakay sa Canter delivery truck (YAH 580) dihang sila gipamusil sa riding in tandem.

Nakaangkon og daghang mga samad pinusilan si Roble hinungdan sa iyang hinanaling kamatayon samtang ang helper naigo og makaduha sa wala nga bahin sa iyang lawas.

Ang mga killer nanibat padung sa Brgy. Tabla, Liloan. (GPL)