Usa sa siyam ka mga sakop sa pamilya nga gidala sa tambalanan sa Isla sa Olango sa dakbayan sa Lapu-Lapu namatay human sila gikatahong nakakaon og puffer fish o mas naila nga buriring niadtong Miyerkules, Agusto 3, 2022.

Giila ang biktima nga si Rosana Evardo, 57, taga Sitio Sidlakan sa Caubian Island, dakbayan sa Lapu-Lapu. Si Joel Semblante, hepe sa Sta. Rosa Community Hospital, nitug-an sa SunStar Cebu, nga si Evardo gideklarar nga dead on arrival dihang gidala sa tambalanan mga alas 12:55 sa udto sa samang adlaw.

Sa buwag nga pakighinabi, si Dr. Eris Augusto, kinsa nagsilbing attending physician, niingon nga ang laing walo ka mga miyembro, lakip ang bana ni Evardo, ilang upat ka mga anak nga lalaki ug tulo ka mga apo, niabot usab sa tambalanan mga alas 4:45 sa hapon.

Si Augusto niingon nga silang tanan anaa na sa stable nga kondisyon kagahapon, Agusto 4, 2022.

Dugang ni Augusto, ang pamilya adunay ideya nga ang buriring makahilo. “Sayop lang daw pagkaluto sa iyahang anak..” matod sa amahan. Ang mga doktor nipasidaan sa publiko nga likayan ang pagkaon sa buriring.