HINGPIT nang natapos ang 2019. Sa tibuok tuig, gibantayan sa Superbalita Cebu ang mga panghitabo. Sa tanan, adunay 10 nga maoy ginaistoryahan, labina sa Facebook page sa SuperBalita, facebook.com/Superbalita Cebu.

1. Ang Walk with Mary, usa sa mga relihiyusong kalihukan samtang mag-angat ang kapistahan ni Sr. Santo Niño.

2. Pagpatay sa magtiayong Michael ug Fraldine Kate Kanes niadtong Abril 15, sa mga eskina sa AC Cortes st. ug SB Cabahug, Dakbayan sa Mandaue.

3. Mimugna og tensyon ang rali sa militanteng mga grupo ug kapulisan sa may Camp Sergio Osmeña atol sa kasaulogan sa anibersaryo sa Edsa People Power Revolution. Gipatukaran ang mga aktibista og Voltes 5 ni kanhi PRO 7 Director Debold Sinas.

5. Tulo ang patay, lakip na ang giingong gunman, sa pinusilay tali sa kapulisan sa Dakbayan sa Talisay ug usa ka Filipino-American sa Barangay Lawaan 3 niadtong Mayo 16.

6. Nanglimbawot ang mga balhibo sa nagtan-aw ug naminaw sa video sa pagsaulog ni Pope Francis sa unang gabii sa Simbang Gabi sa Vatican City, diin gikanta ang ‘Maria Rayna sa Pilipinas.’

7. Gisaksihan usab sa Superbalita Cebu ang pagbukas sa Oceanarium sa South Road Properties niadtong Agusto 23.

8. Way di mag-trending basta gugma na ang hisgutan. Ang video sa kasal nila ni Greg ug Pinky Velasco niadtong Hulyo usa sa mga giestoryahan og maayo sa social media. Gikasal sila sulod sa ilang balay samtang si Pinky nag-antos sa cancer.

9. Kinsa bay makalimot sa linuog nga pagpatay kang Christine Silawan, teenager nga gipatay ug gilaplap ang nawong dihang nakaplagan sa usa ka bakanteng luna sa Barangay Bangkal, Dakbayan sa Lapu-Lapu niadtong Marso? Labina gyud dihang giangkon ni Renato Llenes nga siya ang nipatay sa dalaga ug nisaysay sa kinatibuk-ang hitabo.

10. Gisawsawan sab ang estorya sa duha ka giingong mga libakera nga gidakop ug gipriso makadiyot tungod sa kasong Cyber Libel nga gipasaka batok kanila. (MVG)