KANANGA, Leyte - Napulo ka mga barangay ning lungsod gideklarar nga drug cleared, Martes, Oktubre 1, 2019.

Kini gilangkuban sa Barangay, Aguiting, Cacao, Lonoy, Natubgan, Mahawan, Hiloctogan, San Isidro, San Ignacio, Tongonan ug Montealegre.

Matod ni Mayor Matt Torres, dako niyang kalipay nga nadugangan ang mga barangay sa lungsod nga nadeklarar nga drug cleared.

Sa wala pa molingkod pagka mayor si Torres, sa 23 ka mga barangay, usa lang ang nadeklarar nga drug-cleared.

“Naa pa gani ko nahibaw-an nga kadtong pag declare is for compliance lang,” matod sa mayor.

Gipalanog ni Torres nga una pa mahuman ang 2019, buhaton niya ang tanan nga madeklarar nga drug cleared ang tibuok lungsod sa Kananga.

“Di man gyod ta 100 percent sure but sigurado ko nga ang kanang 11, mapun-an gyod na nato pero ako paningkamutan nga mahurot gyod og declare tanan nga barangay before mahuman ang 2019,” dugang sa mayor.

Matod ni Philippine Drug Enforcement Agency (PDEA) 8, Director Edgardo Jubay, wa naka kompleto sa mga importanteng dokumento ang miaging administrasyon hinungdan nga usa ra ka barangay ang nadeklarar nga drug-cleared.

“2016 pa nag ba-barangay drug clearing na tayo, 3 years na yun, so, siguro naman pwede na makapag proceed kung kumpleto na sa requirements,” matod ni Jubay.

Dugang ni Jubay nga dunay gipangsumiter sa ila nga mga dokumento pero ila kini gipang-uli ug wa nasab nabalik sa ilang opisina ang mga gipang-uli nga dokumento.

Gidayeg ni Jubay ang kapaspas karon sa Kananga sa paglimpyo sa 10 ka mga barangay batok ilegal nga drugas.

Nipasidaan si Jubay sa mga opsiyal nga dapat ma-monitor nila kung dunay mga ilegal nga kalihukan sa lugar nga gideklarar nga drug cleared. (JKDP)