NAPULO ka mga tawo ang nadakpan sugod niadtong Miyerkules sa gabii hangtud kagahapon sa hapon, Huwebes, Nobiyembre 13, sa managlahing operasyon sa kapulisan sa siyudad sa Sugbo.

Tulo ang nadakpan sa Barangay Sawang Calero, dakbayan sa Sugbo, lakip sa target notado nga namaligya og drugas nga si Maricel Reyes. Laing duha mao sila si Pepe Quimada ug Reynante Tacatani, pulos 35 anyos ug moluopyo sa Block-4, Sawang Calero.

Samtang, upat ang nadakpan sa mga sakop sa Provincial Intelligence Branch (PIB), nga nironda sa Barangay San Nicolas Proper kinsa ang ilang target nga sa Talisay police apan anaa na nagpuyo sa siyudad sa Sugbo.

Matud ni PLt. Col. Marlu Conag, nangulo sa operasyon, ang ilang target sa buy bust nipuyo og boarding house sa Barangay Proper San Nicolas.

Ang mga dinakpan giila ni Conag nga sila si Jummer Alegado, 27, target sa operasyon; John Kristoffer Villanueva, 18, ug boardmate ni Alegado nga nahimo niyang kaabag.

Lakip sa nasikop mao si Domingo Arellano, 55, landlord sa boarding house, ug Jennifer Mansueto 47, paryente ni Arellano

Kagahapon sa buntag sa Sityo Santa Cruz, Barangay Luz ning siyudad nasiko sa pagronda si Emilio Abendan, 22, ug kagahapon sa hapon, laing duha ang nadakpan sa mga operatiba sa PIB sa Sityo San Roque, Mambaling nga sila si Sherwin Sanchez, 42, ug Aleen Garces, 36.

Mobalor tanan og P700 mil ang shabu nga nasakmit sa kapulisan. (BBT)