ANG Cebu City Government mitagana og 100,000 ka surgical masks ngadto sa mga barangay nga maoy labing daghan og mga kaso sa coronavirus disease (Covid-19).

Si City Administrator Floro Casas Jr., nagkanayon nga prayoridad nga hatagan naglakip sa Barangay Suba, Tejero, Mambaling, Labangon, Carreta, Bacayan, Sawang Calero ug Luz.

Ang maong mga barangay girekomendar sa Department of Health (DOH) 7 nga ipaubos sa enhanced community quarantine (ECQ) o lockdwon gumikan sa presensiya sa IgM-based sa rapid test nga niadtong Mayo 9 hangtod Mayo 20.

Posible nga ipatuman ang pag-lockdown sa sityo level, di ang tibuok barangay. Ang nagpositibo sa IgM nagpasabot nga ang tawo nga naa ini dunay infection.

Dugang ni Casas nga sa miaging semana pa sila nanghatag og mask nga ilang gipaagi sa mga barangay official para maoy mohatag ngadto sa ilang mga residente.

Gipahibawo ni Casas nga aduna pay 500,000 ka mga face mask nga anaa sa ilang kustodiya nga ilang ihatag ngadto sa mga barangay ug isolation centers diin temporaryong gipahiluna ang mga asymptomatic (Covid-19) positive. (PAC)