KAPIN sa 10,000 ka punoan sa marijuana ang naibot sa mga sakop sa Provincial Intelligence Unit sa Cebu Provincial Police Office (PIU-CPPO), Philippine Drug Enforcement Agency (PDEA) 7 inabagan sa 1st Provincial Mobile Force Company, Toledo City Police Station ug Naval Forces Central sa Sitio Boyo barangay Captain Claudio bukirang, dapit sa siyudad sa Toledo.

Gibanabana sa kapulisan nga mobalor kini og dul-an sa tunga sa milyon ka pesos.

Matod ni Police Lieutenant Colonel Randy Korret, hepe sa PIU, tulo ka semana sila nga naniid human sa tago gikan sa concerned citizen.

Gihulagway ni Korret nga hilit nga dapit ug mobaktas pa og 15 kilometros gikan sa highway.

Nailhan ang nagtanom nga mao ang managsuong Jun ug Gabriel Aliser, pulos mag-uuma, nakaikyas sa ronda. (AYB)