HINGPIT nang gibutangan ug mga pahibalo pinaagi sa pagtaod og tarpaulin ngadto sa 11 ka mga buhatan sa kagamhanan sa dakbayan sa Lapu-Lapu kagahapon Pebrero 3 atol sa flag raising ceremony.

Ang pahibalo nga gibutang ni Lapu-Lapu City Mayor Junard “Ahong” Chan sa mga buhatan adunay marka “This is a drug-free workplace, let’s keep it that way.”

Si Chan mao usab ang chairman sa City Anti-Drug Abuse Council (CADAC).

Uban ni Chan nga namutang sa pahibalo ang pangulo sa City of Lapu-Lapu Office for Substance Abuse and Prevention C-Losap nga si Garry Lao.

Ang 11 ka mga buhatan nga nabutangan mao ang Office of the Mayor-Execitive staff, Treasurer’s Office, Budget Office, Accounting Office, City Administrator’s Office, Department of Interior and Local Government DILG Lapu-Lapu, Public Information Office PIO, IT Department, Homecare Center sa City Social Welfare and Development Office CSWDO, Human Resource Department Office HRDO, ug City Of Lapu-Lapu Office for Substance Abuse and Prevention C-Losap sa Office of the Mayor.

Gihangop ni Chan nga nakab-ot sa naasoyng mga buhatan ang pagka “drug-free workplace” apan mipahimangno nga dili usab kutob dinhi ang pag monitor sa naasoyng mga buhatan.

Ang kagamhanan sa dakbayan sa Lapu-Lapu adunay moabot sa 47 ka mga buhatan.

“Na-declare sila ni-undergo sila ug drugtest so pasabot niana wala nay drugas sa ilang gitrabahoan but naa gihapon puhon unya nga laing round of drug testing.” matod ni Chan.

Ang pangulo sa C-Losap nga si Garry Lao miklaro nga dili ang tibuok city hall ang ilang gideklarar nga drug-free kundi ang indibidwal lang nga buhatan. Kini gumikan kay mao usab kini ang mga buhatan nga napa-ubos sa drug test ug nag negatibo ang mga empleyado niini sa paggamit ug ginadiling drugas.

Mao kini ang usa sa gibasehan sa ilang gibutangan ug mga pahibalo o tarpaulin sa matag buhatan.

Sa talaan ni Lao aduna pay 30 porsyento sa mga buhatan sa Lapu-Lapu city hall nga wala mapaubos sa drug test sa ilang buhatan.

“Nahutdan ta ug kit unya more or less less rasad atong nadungog (aning ubang opisina) in-ana for example naay feedback nga naay nag drugs diha e-test nato dayon para ma-confirm, naa tay mga offices pero e-prioritize lang nato ang field offices kay mao man guy kasagaran.” pagpasabot ni Lao. (GCM)