USA ka seaman uban sa 12 ka mga tawo ang nasikop sa tigbakayan sa Purok Chicos, Barangay Magay, lungsod sa Compostela niadtong Biyernes sa alas 2:20 sa hapon, Agusto 14.

Wala makadagan ang seaman nga si Allan Jacobe, 35, minyo, taga Barangay Magay, Compostela, dihang naabot sila si Captain Vincent Zozobrado, hepe sa Compostela Police Station, ug mga kauban human dunay nagpakabanang mga residente mi-report kabahin sa nagpadayong saltada sa tigbakay.

Matod ni Zozobrado, nga atol sa ilang pagrespondi ubay-ubay sa mga namusta ang nagkatibuwag sa pagpanagan, 12 ka sugarol ilang nasikop.

Ang mga nasikop sila si Eden Lavisores, 35, taga Maslog Danao; mga silingan niini nga si Roque Guingosa, 35; Armand Lumapas, 35; Arwin Lumapas; Jonel Yray, 31; Kevin Murillo, 31; John Philip Murillo, 35; Rey Austria, 25; Morito Monisit, 28; Joselito Tambalos, 28, Brgy. Canamucan, Compostela; ug John Christian Basle, 28, taga Magay, Compostela.

Si Zozobrado niingon nga ang maong mga dinakpan nagkasabot nga anha sila sa maong dapit nipahigayon sa tigbakay.

Sanglit hilit kini ug dili sila dali nga makit-an, apan dunay mga residente ang nipahibalo sa kapulisan hinungdan nga dali nilang girespondihan.

Nakuha nila ang tulo ka mga manok igtatari, duha ka mga bulang ug ang pusta nga P1,500.

Gipadayag niini nga sulongsulong ang gihimo karon sa mga sugarol ug magbalhin sab sila og lugar aron dili dayon maatikan sa kapulisan. (GPL)