NIABOT na og 13,000 ka mga pasyente ang natabangan sa Malasakit Center kinsa nadangat ug natambalan sa ilang mga gihambin nga balatian didto sa Vicente Sotto Memorial Medical Center (VSMMC).

Kini ang gibutyag ni Secretary Michael Dino sa Offic of the Presidential Assistant for the Visayas (OPAV) diin iyang napanglantawan nga mosaka pa ang gidaghanon sa mga pamilya nga matabangan

Si Christopher “ Bong” Go, Special Assistant to the President kinsa maoy gitahasan ni Presidente Rodrigo Duterte sa Malasakit Program, nagkanayon nga sa higayon nga mahurot na ang P50 milyones nga pundo a sa Central Visayas ilang dugangan.

Matod ni Go, ang maong budget gikan sa Socio Civic Funds ilawom sa Offic of the President sa tinguha nga matabangan ang mga pamilya kinsa walay ikasarang sa pagpatambal.

Ang Secretary sa OPAV nagkanayon nga ang Malasakit Center maoy katapusang mobayad sa hospital bills sa mga pasyente human makunhoran ang ilang bayranan gikan sa PhilHealth, PCSO ug ubang ahensiya sa gobiyerno diin ilang gitinguha nga wala nay bayranan ang pasyente.

Si Go, kinsa gitawag ni Duterte og “my favorite senator” sa mga dagkong tigom, niingon nga wala pa sa iyang plano ang pagpapili sa sunod tuig nga mid-term election sanglit nakatutok siya sa pagpalapad sa serbisyo sa Malacañang.

Karong Mayo 22, inagurahan ang Malasakit Center o sa dakbayan sa Tacloban nga maoy sentro sa Region VIII.

Dugang sentro tukuron sa ubang dapit sa nasod. (PAC)