GITUGYAN na sa Bayanihan Cebu Executives and International Eucharistic Congress (IEC) Field Center ngadto sa Department of Health nga maoy mo-operate sa 130-bed capacity alang sa symptomatic coronavirus disease (Covid-19) positive dinhi sa Sugbo.

Si Edmund Liu, sakop sa Bayanihan Cebu, nagpasalamat ngadto sa mga benefactor kinsa maoy ningtabang para mahuman ang pasilidad nga sama sa Sacred Heart School nga kasamtangan nga gipahimuslan.

"This IEC Field Center which we will bless and turn over to DOH colleagues today will hopefully add the capacity. We have 130 beds in this center, housed in five shelters that are fully equipped with negative pressure and medical grade hepa-filters in order to protect better our frontliners, our patients and also our neighboring communities," padayag ni Liu.

Nagpasalamat ang Bayanihan Cebu, kinsang grupo giumol pinangulohan ni Secretary Michael Dino, kauban ang batch 85 ug 72 sa Sacred Heart School aron mapabarog ang pasilidad inabagan sa Archdiocese of Cebu pinangulohan ni Archbishop Jose Palma.

Gipadayag ni Liu nga aduna nay 34 ka Covid symptomatic patients nga giatiman sa Sacred Heart School Field Center nga adunay 48-bed capacity.

Duha sa mga pasyente hingpit nang naka-recover.

Gipadayag niya nga sa hilom, sila nag-ampo nga unta ang maong pasilidad di magamit sanglit kini nagpasabot nga himsog ang panglawas sa katawhan.

"To be honest, one of our single prayers here in Bayanihan Cebu is we constantly pray that these facilities will not be needed. As they say, pragmatism dictates that it is better to have them and not need them, than need them, and not have them," dugang ni Liu.

Si Department of Health Regional Director Jaime Bernadas, nagkanayon nga dihang nitawag kaniya ang opisyal sa simbahan labot sa pagpagamit sa IEC, wa siya mag-usik bisan og Segundo, ila dayon kining gisusi para matrabaho aron himuon nga quarantine center.

Ang pag-abli sa IEC Field Center gitambungan nilang Mayor Edgardo Labella, Gobernador Gwen Garcia, Mayor Jonas Cortes, Mayor Junard Chan ug mga opisyal sa lainlaing ahensiya sa gobyerno, lakip na ang kapulisan ug kasundaluhan. (PAC)