Nikirig patay ang bayong-bayong sa dihang iyang nahikapan ang nagyongyong nga linya sa kuryente sa Sityo Upper Lahug, Barangay Mantalongon, lungsod sa Dalaguete.

Nahitabo kini Lunes, Nobiyembre 23, 2020, alas 4:00 sa hapon.

Wa matabang si John Lloyd Pialan, 14, nagpuyo sa nahisgutang lugar ug tinun-an sa Grade-9, tungod sa kakusog sa kuryente.

Matod ni Police Major Pedy Noval, hepe sa Dalaguete Police Station nga nahinabi sa Superbalita Cebu, si John Lloyd naghatod og mga utanon ug pauli na sa ilang balay niadtong tungora.

Sa pag-agi niya sa maong dapit nagbabag sa agi-anan ang linya sa kuryente hinungdan nga iyang giwahing.

Nayongyong ang maong electric wire sa Cebu II Electric Cooperative (Cebeco) sa dihang nahulgan sa sanga sa kahoy nga maoy nakaingon nagbitay ang wire nga miresulta sa kamatayon sa batan-on.

Samtang, dali nga giayo ang maong wire sa linemen sa CEBECO aron nga di na masubli ang hitabo. / GPL