SULOD sa 14 ka adlaw, gikinahanglang makakompleto na sa mga rekisitos sa pag operate ang mga plant operators ug mineral processors sa lalawigan sa Sugbo.

Mao kini ang kamandoan ni Cebu Governor Gwendolyn Garcia atol sa tigum sa perators ug processors nga nag operate sa Probinsya.

Sa Oktubre 28 mao na ang uwahing adlaw nga maka sumiter sa rekisitos ug pagkuha og governors permit.

Gipahinumdoman ni Garcia nga may ordinansa ang Probinsya nga naglatid nga kinahanaglan nga mokuha og governors permit ang tanan nga mga crushing operator.

Gilakbitan ni Garcia ang giamendahan nga Revenue Code sa Sugbo ubos sa Section 124 diin gikinahanglan nga mohatag og 10 porsyento nga tax sa local fair market value matag cubic meter sa tanan nga ordinaryong mga bato, balas, graba ug uban pa nga quarry resources nga gi-extract sa hurisdiksyon sa Probinsya.

Lakip gihapon sa molukat niini kadtong mga naghupot og uban pang mga permits, lisensya, mga kontrata ug uban pa nga kasabutan nga giisyu sa laing mga ahensya gawas sa Kagamhanan sa Lalawigan sa Sugbo sama sa industrial permit nga gi-isyu sa Mines and Geosciences Bureau (MGB).

“Kinahanglan gyud ninyo nga mo kuha ug governors accreditation, bisan pa ang inyong gikuptan permittee man kaha mo gikan sa MGB, magpa accredit mo sa inyong crushing plant or processing plant,” matod ni Garcia pinaagi sa news portal sa Kapitolyo.

Ang mapakyas sa pagbuhat niini mahimong ma isyuhan og cease and desist order.

Gipasabot ug gipasalig ni Garcia nga ang buhis sa pagkubkob mobalik kini sa panudlanan sa gobyerno. / ANV