MOABOT sa 14 ka mga sakyanan nga nag-overnight parking sa dalan ang gipang-clamp sa mga sakop sa Cebu City Traffic Operation (CCTO) sa Barangay Sawang Calero, Dakbayan sa Sugbo Biyernes sa kaadlawon, Agusto 30, 2019.

Lakip nga gipangbutangan og clamp ang mga trak, apil ang mga trak sa mga nangumpra og isda sa may Pasil Fish Port, nga nag-park sa kadalanan.

Una nang giingon ni CCTO operations chief Andres Bayarcal nga walay bisan kinsa ang exempted sa clamping.

Kon ang usa ka sakyanan na-clamp, dili buot pasabot nga i-tow na kini dayon.

Ang mga tag-iya sa mga sakyanan manginahanglang magpakita sa opisina sa CCTO kuyog ang citation ticket nga nag-overnight parking ug ang bayad nga P1,500.

Kon dili kini mahimo sa 8 ka oras, ang sakyanan mahimo nang i-tow, usa ka dugang nga violation. Ang towing fee anaa sa P1,500.

Sunod-sunod nga gibantayan sa buhatan sa CCTO ang mga kadalanan sa dakbayan, ilabi na sa gabii, atol na pud sa direktiba ni Presidente Rodrigo Duterte kauban ang Department of the Interior and Local Government nga pahawanan ang mga pampublikong dalan. (Superbalita Cebu)