NA-IMPOUND ang 15 ka mga motorsiklo ug sakyanan nga nasakpan nga adunay traffic violations atol sa hiniusang operasyon sa Highway Patrol Group (HPG) 7 ug Naga City Police uban sa traffic enforcers ubos sa ilang Oplan Lambat Bitag kagahapon, Disyembre 30.

Si Police Captain Mike Gingoyon sa HPG-7 nagkanayon nga naka-isyu sila og 86 ka temporary operators permit (TOP) ug 18 ka traffic citations nga niresulta sa pagka-impound 13 ka motorsiklo ug duha ka four-wheeled vehicle.

Matod ni Gingoyon nga sagad sa violation mao ang no-registration, overloading, unprescribed bed, no helmet ug gubaon nga mga suga.

Kini apil sa operation Lambat Bitag sa HPG-7 nga gipangulohan ni Regional Chief Police Colonel Erwin Rebellon nga gisugdan sayo sa buntag sa Miyerkules, Disyembre 30, 2020.

Giawhag ni Gingoyon ang mga motorista nga mosunod sa mga lagda sa trapiko sama sa pagsul-ob og helmet, pagparehistro sa ilang mga sakyanan, ayuhon ang mga depektuso nga suga aron dili madakpan kon adunay mga operasyon sama sa gibuhat sa HPG.

Gipasabot sa pangulo sa HPG sa lalawigan sa Sugbo nga si Gingoyon nga ang ilang gibuhat mao ang pagsiguro nga luwas ang mga tawo sa ilang pagbiyahe sanglit ang HPG gitawag og “Guardian of the Highway.” (PAC)