Dili mominos 15 ka mga indibiduwal ang nadakpan kagahapon, Enero 24, sa unang Sunday lockdown sa Barangay Guadalupe, dakbayan sa Sugbo tungod sa estrikto nga pagpatuman sa health protocol sa barangay tungod sa pagtaas sa kaso sa Covid-19 sa dapit.

Ang Guadalupe maoy nag-una sa mga barangay sa kaso sa Covid-19.

Matod ni Guadalupe Barangay Captain Michael Gacasan, nga 15 pa ka mga tawo ang nadakpan sa kapulisan sa ilang pagpatrolya.

Uban ang mga sakop sa barangay tanod sa nahisgutang barangay ug volunteers nga maoy namadlong ug nagsusi sa mga tawo nga taga Guadalupe nga molakaw nga walay dala nga quarantine pass.

Matod ni Gacasan, nga nagsige pa og pangdakop ang mga pulis ug uban pa nga volunteers hinungdan nga naglaum si Gacasan nga mosaka pa ang ihap sa mga madakpan.

Ang nangadakpan sugod sa buntag sa Dominggo, Enero 24.

Matod ni Gacasan, gihatud sa Barangay Tejero gym aron motinir sila og mga oras kon unsa ang ipabuhat sa mga sakop sa Prevention, Restoration, Order, Beautification and Enhancement (Probe) Team kanila. (BBT)