MUABOT sa 16 ka estudyante sa senior high school sa Barangay Can-asujan, dakbayan sa Carcar ang gidalig dala sa tambalanan human kini sila nawagtangan sa panimuot ug naglisud ug ginhawa.

Nagduda ang mga residente sa maong bukirang barangay nga giingon nga nasudlan ug dautang espirito ang mga estudyante human kini nagduwa-duwa sa usa ka kakahuyan samtang nag-andam sila sa ilang umaabot nga sayaw.

Pero gihimikak sa panguo sa Carcar City Local Disaster Risk Reduction and Management Office nga nasudlan ug dili ingun ato ang mga estudyante kundi nagpakita lang sila ug sintomas sa "panic attack."

Sigon ni Kim Lauron, panguo sa CCLDRRMO, nga nadawat nila ang maong insidente pasado 1 p.m. sa hapon Lunes, Hulyo 8, 2019.

Matod pa ni Lauron nga nagsugod ang maong insidente sa usa sa mga lawak sa senior high school sa Can-asujan National High School.

Nagklase pa ang mga estudyante niadtong higayona sa dihang usa sa mga tinun-an ang kalit nang nakuyapan ug nawagtangan ug panimuot.

Human nakuyapan ang maong tinun-an ug gitabang sa mga maestra, laing grupo sa estudyante ang nikalit sad ug kakuyapan ug naglisud ug ginhawa.

Matod pa ni Lauron nga naglisud sila ug dala sa uban sa mga estudyante nga gitabang kay tungod mukalit lang silag pangusog.

Niabot sa 16 ka estudyante ang nadala sa Carcar City Provincial Hospital para mahatagan ug tabang medikal.

Sigon ni Lauron nga nakadungog siyag mga hungihong gikan sa mga residente sa maong barangay nga giingon nasudlan ug dautang espirito ang mga estudyante human sila nagpractice ug sayaw dapit sa usa ka kahoy nga giingon taw-an.

Ang maong mga estudyante giingong nagpractice para sa umaabot nga "Festival of Festivals" nga gipasiugda sa lokal nga kagamhanan sa siyudad sa Carcar niadtong Sabado.

Pero gipagamay kini ni Lauron ug posibleng nag "panic attack" lang kini tungod sa sige nila ug practice para sa ilang sayaw.

Ni-rekomendar si Lauron sa principal sa maong eskwelahan nga temporaryong i-suspenso lang sa ang ilang klase sa pagkakaron. (JKV)