Kapulisan sa dakbayan sa Mandaue mopasaka og duha ka mga kaso batok sa Indian national nga nasikop sa entrapment niadtong Huwebes, Marso 30, 2023 sud sa usa ka motel sa North Reclamation sa dakbayan.

Mao kini ang gibutyag ni Police Major Romeo Caacoy, hepe sa Subangdaku Police Station nga maoy nipahigayon sa operasyon nga iyang gipangulohan, sa iyang text message sa Superbalita Cebu sa Sabado, Abril 1.

Matod ni Caacoy nga ang suspek nga si Suroj (tinuod ngan gipugngan) pasakaan og kasong grave coercion in relation to Anti Cyber Crime Law ug kalapasan sa Republic Act 9262 kun Anti-Violence Against Women and Their Children Act of 2004.

Si Suroj temporaryong gibilanggo sa Subangdaku Police Station samtang giandam ang mga kaso nga ipasaka batok kaniya sa Lunes, Abril 3.

Ang suspek gireklamo sa 21 anyos nga dalaga nga iyang kanhi uyab nga nanghulga nga ipakatap ang ilang sex video kon di kini makighilawas kaniya.

Nipasangil ang dalaga nga usa pa ka tinun-an nga nibalibad na siya apan nagsige og panghulga ang suspek kaniya.

Magpabayad pa kini og tag P3,000 kada usa sa upat ka giingong sex videos.

Tungod sa kahadlok sa dalaga, napugos siya sa pagdangop sa kapulisan nga maoy niplano sa entrapment.

Ang langyaw nanghimakak sa mga pasangil batok kaniya.