USA ang gidakop samtang usa ang nitahan sa kapulisan sa dakbayan sa Tagbilaran sa probinsiya sa Bohol kagahapon, Abril 6, nga pulos nag-atubang og kasong kalapasan sa Securities Regulation Code o nag-dealer o broker nga walay lisensiya ubos sa Securities ang Exchange Commission (SEC) .

Si Police Lieutenant Zen Cheung, tigpamaba sa Bohol Police Provincial Office (BPPO), nagkanayon nga ang mga akusado dunay warrants of arrest.

Alas 9:30 sa Miyerkules sa buntag sa Barangay Poblacion II, dakbayan sa Tagbilaran Bohol, gidakop si Ariane Grace Becaldo Arao-arao, 29, taga Barangay Tiwala, lungsod sa Panglao.

Si Arao-arao gipriso sa selda sa Tagbilaran City Police Office (TCPO). Sa alas 8:30 sa buntag sa samang adlaw, gisikop si Elorde Commendador, 25, lumolupyo sa Barangay Ubojan sa lungsod Loon.

Matud ni Cheung nga kining duha dunay gipang-atubang nga mga kaso nga kalapasan sa Republic Act (RA) 8799 kun Securities Regulation Code nga giluwatan sa ni Judge Jorge Dote Cabalit, presiding judge sa 7th Judicial Region, Regional Trial Court (RTC) Branch 48 Tagbilaran, Bohol nga may piyansa nga P126,000 matag usa.