Duha ka mga amahan ang nalumos atol sa Father’s Day niadtong Dominggo, Hunyo 20, sa buntag ug hapon.

Wala matiwas ang salosalo sa usa pamilya human ilang amahan nalumos samtang naligo sa dagat sa alas 3:30 sa hapon sa Barangay Basdako, lungsod sa Moalboal.

Si Alexander Macasero, 60, minyo ug taga Alaska, Barangay Mambaling, dakbayan sa Sugbo, dead-on-arrival (DOA) sa tambalanan.

Si Patrolman Efren Marte Alsola, sa Moalboal Police Station nga nahinabi sa Superbalita Cebu nagkanayon ang pamilya sa namatay mibutyag nga nalingaligo sila sa dagat kay magselebrar sa Father’s Day.

Usa sa mga anak mibutyag nga nakit-an niya iyang amahan nga nagkapakapa sa paglangoy hinungdan nga iyang gitabang kay nalumos na kini.

Gidali nila sa pagdala sa tambalanan, apam gidekalarar kini nga DOA. Gituohan sa pamilya nga giatake kini hinungdan nga nalumos.

Samtang namatay sab ang usa ka amahan human malumos sa alas 6:30 sa buntag sa samang adlaw sa Barangay Catarman, lungsod sa Liloan.

Si Jovenal Jayson Leswe, 61, ug minyo, nakit-an na lang sa mga residente sa dapit nga wala nay kinabuhi.

Ang biktima gikatahong nanagat kini dihang gituohan nga giatake. (GPL)