DILI angay mabalaka ang mga senior citizen ug person with disability (PWD) sa dakbayan sa Sugbo sanglit dunganon og hatag ang ilang duha ka buwan nga financial assistance gikan sa Cebu City Government.

Si Atty. Jerone Castillo, pangulo sa City Treasurer’s Office (CTO), nagkanayon nga wala ma-release sa hustong buwan ang tabang sa mga lolo ug lola lakip na ang mga PWD sanglit wala kini hatagi og budget sa administrasyon ni kanhi mayor Tomas Osmeña.

Ang kwarta nga gipundo para sa maong mga benepisyaryo kutob ra niadtong Hunyo ug nagkinahanglan og laing budget nga ipasar sa konseho para sa ilang ayuda gikan sa Hulyo paingon sa Disyembre.

“Dunganon na lang na og release ang July ug August. Ang financial assistance ihatag gyud na sa mga senior citizen ug PWD’s apan nalangay lang kay wala man binli og kwarta sa kanhi administrasyon ang City Hall para sa maong ayuda. Wala nay budget,” padayag ni Castillo.

Gipadayag sa pangulo sa CTO nga giandam sa buhatan ni Labella ang upplemental budget number 2 diin lakip sa mga gipangayoan og pundo seniors ug PWDs.

Si Castillo nagkanayon nga lakip sa SB 2 mao ang P455 milyones ug P80 milyones nga para sa senior citizen ug PWD kinsa aduna pay gipaabot nga tag P6,000 kon P1,000 matag buwan gikan sa Hulyo paingon sa Disyembre.

Dunay kapin 75,000 ka qualified senior citizens ug kapin 12,000 ka PWD ang makabenepisyo sa maong ayuda.