DUHA ka mga dump truck ang gipa-impound sa Mandaue City Environment and Natural Resources Office kon (MCENRO), human suway unta nga nilabay og mga basura, padung sa Material Recovery Facility (MRF) sa dapit sa napasirado nga Umapad dumpsite.

Gitug-an ni Placido Jerusalem ang assistant head sa MCENRO nga gi-intercept kini human wala nakapakita og environmental transport permit.

Kon nakalapas sila sa Mandaue City Ordinance No. 14-2017-1221 kun imposing stiffer penalties and fines for solid or liquid waste management and disposal.

Nakalapas kini sa pagkulekta og mixed wastes ug way transport permit nga gi-isyu sa City mayor.

Ang usa sa una nga na-intercept sa Eco enforcer, diha sa bukana sa dan padung Umapad dumpsite, niadtong Enero 15 ning tuiga sa alas 7:35 sa buntag, ang truck iya sa Mantech company.

Matud ni Jerusalem nga gihatagan lang una nila kini og notice of violation.

Apan niadtong alas 11:20 sa gabii, Enero 16, nibalik na usab kini, hinungdan nga giimpound na gyud.

Enero 20 sa alas 5:05 sa hapon, laing truck na usab nga iya sa RMS Petroleum Technology and Waste Management Corp. ang suway nga molabay sa mga karga nga basura, nga wa gihapon kini transport permit.

Apan giklaro ni Placido nga dili medical waste ang su’d sa maong mga garbage truck, sukwahi sa mga nanggawas nga taho, kundi mga mixed solid waste, sama sa industrual ug household waste.

Matud ni Jerusalem nga giangkon sa nagmaneho sa maong mga truck nga ang basura gikan gikolekta sa usa ka mall sa dakbayan sa Sugbo.

“Atong giklaro even before sa atong apprehension, pagsita pa lang nato, ato na gisiguro pag-check, dili siya mga medical waste ilahang karga, kundili pure mga solid waste ra gyud, not infectious waste,” pagpaklaro ni Jerusalem.