NORTHERN Samar -- Duha ka mga kalamidad niigo sa Northern Samar sud sa usa ka adlaw.

Niadtong Sabado, Agusto 3, 2019 sa ala 1:28 sa kaadlawon, niigo ang makusog nga linog.

Base sa datos sa Philippine Volcanology and Seismology (Phivolcs), magnitude 5 ang gikusgon sa linog.

Sentro niini ang lungsod sa Pambujan.

Ang intensity 4 nabatyagan sa lungsod sa Catarman, Mondragon ug Bobon, Northern Samar.

Samtang intensity 3 naman ang nabatyagan sa Virac, Catanduanes ug Mapanas, Northern Samar.

Intensity 2 naman sa dakbayan sa Legazpi ug Sorsogon.

Wa hinuon naitala nga nangadaut sa mga lugar nga nakasinati sa linog.

Karong adlawa, ang Ormoc City sa Leyte maoy host city sa ika 3rd quarter nationwide simultaneous earthquake drill.

Samtang pasado alas 8 sa buntag sa samang adlaw, 11 ka mga balay ang nangaguba sa lungsod sa Lavezares sa Northern Samar human giigo sa buhawi.

Base sa datos sa Lavezares Disaster Risk Reduction Management Office, tulo ka mga balay ang naguba sa Barangay Libas; lima sa Cataogan ug tulo sa San Miguel.

Nakaangkon usab og kadaot ang public market sa lungsod.

Walay naitala nga pagbaha, landslides ug mga evacuees.

Wa say nakalas sa duha ka mga kalamidad.