PALAPAG, Northern Samar - Duha ka mga sakop sa Civilian Armed Forces Geographical Unit (Cafgu) gipamusil patay samtang nagsakay sa usa ka motorsiklo, alas 2:20 sa hapon, Biyernes, Oktubre 18, 2019.

Giila ang mga biktima nga sila si Jason Rebay, anaa sa hustong edad, ug Gerry Ortea.

Ang duha nadestino sa 52nd Civilian Active Auxiliary (CAA) detachment, 20th Infantry Battalion, Philippine Army ning lungsod.

Base sa imbestigasyon, ang duha sakay sa usa ka motorsiklo paingon sa Barangay Pangpang ning lungsod.

Pag-abot sa lugar nga nahitaboan, ning-abot ang wa matino nga gidaghanon sa mga armadong tawo ug gipamusil ang mga biktima.

Nakaangkon og daghang mga samad pinusilan sa ilang lawas ang mga biktima hinungdan sa hinanali nila nga kamatayon.

Dali nga misibat sa wa matino nga direksyon ang mga gunman.

Narekober sa kapulisan sa crime scene ang duha ka mga kabhang sa 5.56mm ug usa ka bala.

Padayong gisusi sa kapulisan ang motibo ug responsable sa krimen, apan daghan ang nagtuo nga rebeldeng New People’s Army (NPA) ang mibuhat sa krimen. Wa ilibkas sa kapulisan ang posibilidad apan ila gihapon paladman ang imbestigasyon. (JKDP)