GAMAY, Northern Samar - Duha ka top most wanted ning lungsod nasikop sa kapulisan sud sa usa lang ka adlaw.

Nasikop mao ang number 1 most wanted nga si Gerardo Tiberio, 49, taho vendor, nagpuyo na sa Rodriguez, Rizal.

Ang ikaduhang nasikop mao ang no. 2 most wanted nga si Rio Cesneros, 36.

Matod sa Police Regional Office (PRO) 8, si Tiberio nag-atubang og kasong kalapasan sa Comprehensive Dangerous Drugs Act of 2002 samtang si Cesneros dunay kasong murder.

Pinasikad sa warrant of arrest nga giisyu ni Eugenio Dela Cruz, presiding judge sa Branch 21 sa Northern Samar, mibiyahe ang kapulisan pinangulohan ni Police Major Arnoldo Gambo sa Rizal.

Kauban ang kapulisan sa Rodriguez, Rizal, una nga gidakop si Tiberio sa Sitio Maislap, Barangay San Isidro, diin wa na siya makapalag nga gipusasan sa kapulisan.

Sunod nga giadto sa kapulisan ang lungsod sa Jala Jala sa Rizal diin nasikop si Cesneros pinasikad sa warrant of arrest nga giisyu ni judge Jose Mijares sa Branch 21, Laoang, Northern Samar sa kasong murder.

Si Tiberio gidala sa Rodriguez Police Station samtang sa Jala Jala Police Station gidala si Cesneros alang sa dokumentasyon ug gidala pagbalik sa Gamay.

Matod sa kapulisan, agi kini sa ilang padayon nga paglutos sa mga most wanted person.

Ang kapulisan nisaad nga daghan pa nga most wanted ang ilang target nga madakop para masiguro nga magpabilin ang kahapsay ug kalinaw sa lugar.

Giawhag usab sa kapulisan ang publiko sa pag report sa duol nga police station kon dunay mahibaw-an nga most wanted nga nagtago sa ilang lugar ug i-report ang illegal nga mga kalihukan. (JKDP)