Mga sakop sa anti-communist group ug active auxiliary force sa Philippine Army ang gibanhigan niadtong Lunes, Abril 16, sa alas 5:15 sa hapon sa Sitio Canduing, Barangay ALoja, Batuan, Bohol.

Ang Batuan Municipal Police Station ubos sa Bohol Police Provincial Office (BPPO) nakadawat og tawag gikan kang Barangay Chairwoman Gloria Sambayon sa Brgy. Aloja sa Batuan, Bohol nga nitaho kanila bahin sa pagpamanhig sa dapit.

Ang mga sakop sa Batuan Police Station uban sa 47th Infantry Brigade, Philippine Army ningtubag sa alarma.

Sumala sa pakisusi sa awtoridad, ang mga biktima nagsakay sa ilang motorsiklo pauli sa ilang dapit human nipahigayon og anti-communist campaign sa Barangay Aloja dihang gibanhigan.

Ang mga biktima mao sila si Rolando Pornes sa Brgy. Buhog, Carmen Bohol, ug Jaime Cagatin sa Brgy. Salvador, Sierra Bullones, Bohol nga gikatahong namatay sa pagpabanhig sa gituohang mga sakop sa communist terrorist groups (CTGs).

Samtang si Antonio Muring, 44, taga Brgy. Napo, Alicia, Bohol ug sakop sa Cafgu Active Auxiliary (CAA) sa 47IB, Philippine Army nga nadestino sa RCPD/47IB, PA sa Camp Rajah Sikatuna isa Carmen, Bohol ang angol.

Apan ang iilang kauban nga si Micheal Hinampas, taga Brgy. Bicao, Carmen, Bohol, ug miyembro sa CAA gikatahong missing.

Si Muring niingon nga iyang positibo nga nailhan ang ilang kanhi kauban sa CTG movement nga sila si Romeo Nabas ug Ruben Nabas sa Barangay Rizal, Batuan, Bohol nga kabahin sa grupo nga namanhig kanila. Siya gidala sa Cong. Simeon Toribio Memorial Hospital.

Ang lawas nila ni Pornes ug Cagatin gidala sa Holy Name Funeral Homes sa Batuan, Bohol.

Ang mga biktima giingong pulos sakop sa anti-communist group nga gitawag og Bohol Organized New Guardians Association Inc.-Grupong Bol-anon Alang sa Kalamboan ug Kalinaw.

Si PRO 7 Regional Director Ronnie Montejo nikondenar sa maong pagpamanhig sa mga komunista.

“Akong pahasubo sa pamilya sa namatay ug sa mga naangol mahitungod sa atong kampanya batok sa terorismo. Kami sa pwersa sa kapulisan sa Police Regional Office 7,” matod ni Montejo. (AYB)