Patay nang napalgan ang duha ka batan-ong mga lalake nga na missing samtang nangaligo sa dagat, Martes ala 1:00 sa hapon, Abril 20, 2021 sa Sitio Canlusog, Brgy. San Isidro, lungsod sa San Francisco, mga isla sa Camotes.

Ang ilang upat ka mga kauban na-rescue sa samang adlaw.

Napalgan alas 9:21 sa buntag sa Miyerkulis sa samang lugar ang mga biktimang giilang sila si Clark Costanilla Paradero, 21, nagpuyo sa nahisgutang lugar ug si John Mark Gerodias, 18.

Samtang unang na-rescue niadtong Martes sa hapon sila si Calbejay Maralang, 16; Joshua Villas, 13; Ruel Paradero, 20, ug Khimuel Wenceslao ,12.

Si Police Staff Sgt. Roldan Florentino sa San Francisco Police Station nga nahinabi sa Superbalita Cebu nagkanayon nga ang mga biktima nangaligo sa diversion nga pantalan.

Ang mga mag barkada naglingawlingaw sa pagpangaligo.

Gipasidan-an sab sila sa ilang mga silingan nga di mokumpiyansa kay kusog ang bawod nga hinungaw sa bagyong Bising.

Apan kalit nga gihapak sa kusog nga bawod ang pito.

Ang mga sakop sa Philippine Coast Guard, Burea of Fire Protection (BFP), kapulisan ug disaster rescue team sa lungsod unang nakaluwas sa upat ka mga batan-on.

Apan sila si Paradero ug Gerodias wa makit-i.

Sa Miyerkulis na sila sa buntag nabangalan sa pagpadayon sa search. (GPL)