DUHA ka mamaligyaay og ilegal nga drugas ang nasikop sa buy-bust operation sa Sitio Mananga 2, Barangay Tabunok, Dakbayan sa Talisay Biyernes sa buntag, Nobiyembre 22, 2019, atol sa nagpadayon nga "Oplan Limpyo Talisay" sa kapulisan.

Giila ang mga dinakpan nga sila Elizabeth Restauro, 53, minyo, molupyo sa maong lugar, kinsa maoy subject sa buy-bust. Naatlan nga kuyog niini mao si Manolito Abe, 40, taga Barangay Lawaan 2.

Giila sa Talisay police nga street level target si Restauro kansang pangalan nitumaw sa dihang mga nagpakabana nga molupyo sa lugar ang nisumbong sa mga pulis. Gawas niini, pipila na usab sa mga dinakpan sa Talisay Police ang motug-an nga gikan kang Restauro ang shabu.

Gipaubos sa pipila ka semana nga surveillance si Restauro, sa dihang positibo nga si siya ang namaligya, gihimo dayon ang buy-bust sa iyang panimalay.

Nakuha gikan sa mga dinakpan ang 11 ka gagmay ug usa ka medium nga pakete sa gidudahang shabu nga motimbang og 5.33 gramos ug gibana-banang mokantidad sa P36,244.

Gikatakdang pasakaan og kasong pagpamaligya ug pagkapot sa ginadiling drugas Lunes, Nobiyembre 25, ang duha ka dinakpan. (FMD)