Gikompirmar sa Department of Health (DOH) Central Visayas sa Martes, Enero 18, 2022, nga adunay 22 ka kompirmadong mga kaso sa Omicron variant sa Central Visayas.

Si DOH 7 Chief Pathologist Dr. Mary Jean Loreche niingon nga 16 sa mga kaso gikan sa overseas Filipino workers (OFW), usa gikan sa returning overseas Filipino (ROF), ug lima gikan sa samples gikan sa lokal nga komunidad.

Matod ni Loreche atol sa iyang press briefer sa Visayas Vaccination Operation Center (VVOC) nga ilang nadawat ang resulta niadtong Lunes, Enero 17, gikan sa Philippine Genome Center sa Manila.

Sa 78 ka sample nga gipadala sa DOH 7, 22 lang ka samples ang kompirmadong positibo sa maong variant. Ang mga sample gikuha sa Disyembre 27, 2021 hangtod Enero 6, 2022.

Sa 22, ang 16 niini gikan sa mga OFW, usa ang ROF ug lima ang community samples.

Wa pa hinuon silay natumbok diin nagpuyo ang nahisgutang mga pasyente kay ila pa usab pahibaw-on ang hingtungang local government units (LGU).

Matod ni Loreche, kadtong nataptan sa variant sa Omicron mahimong makasinati sa mosunod nga mga sintomas: sakit sa tutunlan, hilanat, uga nga ubo, sakit sa lawas, pagpangatsi, ping-ot nga ilong, kakapoy, ug singot sa kagabhion.

Tungod kay ang variant kasagaran makaapekto sa upper respiratory system, si Loreche mirekomendar sa pag-inom og daghang likido ug pagpamalimogmog og init nga tubig ug asin isip posible nga tambal sa balay alang niadtong mibati sa mga sintomas. (dugang taho ni REV)