MOABOT sa 27 ka mga residente sa Dakbayan sa Talisay ang nadakpan niadtong Biyernes sa hapon, Hulyo 3, atol sa pagpatrolya ug pagrekorida sa kapulisan sa lima ka mga barangay sa siyudad.

Ang 26 kanila nakalapas sa quarantine protocol.

Matod ni Police Major Gerard Ace Pelare, hepe sa Dakbayan sa Talisay, nga ang ilang pagpatrolya tubag sa hangyo ni Mayor Gerard Anthony “Samsam” Gullas Jr. human sa konsultasyon tali sa konseho ug mga lumolupyo sa siyudad.

Dugang ni Pelare nga ang paglibot sa nahisgutang mga barangay gitumong sa higpit nga pagpatuman sa general community quarantine (GCQ) protocol.

Ang Siyudad sa Talisay usa sa tulo ka mga dapit sa Lalawigan sa Sugbo nga ubos sa GCQ samtang ang ubang mga lugar ubos na sa modified GCQ.

Ang Talisay maoy dunay labing taas og mga kaso sa coronavirus disease (Covid-19) sa Lalawigan sa Sugbo.

Uban sa kapulisan ang Central Command (Centcom) sa Armed Forces of the Philippines (AFP) ug Bureau of Jail Management and Penology (BJMP).

Ilang gilibot ang Barangays Tanke, San Roque, Cansojong, Dumlog ug Poblacion.

Sa 27 nga nadakpan, 25 wa magsul-ob og face mask, usa wa magdalag quarantine pass samtang usa nakalapas sa Akta Republika 4136 kun Land Transportation and Traffic Code.

Dugang ni Pelare nga ang mga nadakpan gipangdala sa detention cell sa Barangay Cansojong samtang magpaabot sa mga kaso nga ipasaka sa Lunes, Hulyo 6.

Samtang sila nagpatrolya, ila usab nga giawhag ang katawhan nga di magsige og gawas sa balay, motuman sa social distancing, magsul-ob kanunay og face mask kon mogawas sa balay ug magdala og quarantine pass. (BBT)