WA magsilbi ang pamalibad ug gisikop ang 20 anyos nga single mother nga gikatahong nalambigit sa cyber pornography nga migamit og mga menor de edad alang sa katagbawan sa iyang langyaw nga mga kustomer sa internet.

Si Romeo Perigo, hepe sa Women & Children Protection Center (WCPC) Visayas Field Office, nagkanayon nga pinasikad sa search warrant dunay kalabotan sa kalapasan sa kasong Cybercrime Prevention Act of 2012 batok sa inahan, gihimo ang operasyon kagahapon sa udto.

Girumbo ang balay sa inahan nga gitago sa pangalang Cindy sa Sityo Tumoy, Barangay Ibabao, lungsod sa Cordova, Sugbo.

Matod ni Perigo, nga sa wa pa nila i-serve ang search warrant nihimo una sila og online engagement ngadto ni Cindy diin nakonpirmar ang iyang mga law-ay nga binuhatan ug mogamit og mga bata nga kuhaan niya og video o hulagway nga way sapot.

Samtang ang Department of Social Welfare and Development (DSWD) 7 mi-rescue ug tulo ka menor de edad nga nagpangidaron pa og 6 ug 10 o 11 years old lakip na ang duha ka tuig nga anak sa subject.

“Sa online engagement tulo (bata) atong nakit-an. Aduna siyay giingon nga ‘more are coming’,” tipik sa pamahayag ni Perigo. (FVQ)