ARON matubag ang suliran sa nagkahuot nga mga prisohan sa lalawigan sa Sugbo, dugang tulo ka pasilidad ang ipuno sa Bureau of Jail Management and Penology (BJMP) sa Central Visayas ning tuig 2019.

Sumala ni Supt. Rosalina Malahay, provincial jail warden sa Sugbo sa BJMP 7, nakapalit na sila og 26,018 metro kwadrado nga luna nga maoy gitukoran sa Toledo City Jail.

Moabot sa P42 milyones ang budget alang sa katukoran sa maong pasilidad nga gipaabot magsugod og operate sa ikaupat nga quarter karong 2019.

Masulod sa maong pasilidad ang 500 ka persons deprived of liberty (PDL) o kadtong nagpaabot og hukom o husay sa kaso nga ilang giatubang.

Ang PDL lahi sa mga piniriso kay ang nauwahi mao kadtong nahukman na sa mga korte sa ilang kaso.

Samtang, P16 milyones ang budget sa BJMP 7 matag usa sa laing duha ka bag-ong pasilidad nga pabarugon sa mga lungsod sa Balamban ug Tuburan. Ang konstruksyon magsugod sa ikatulong quarter karong 2019.

Sigon niini nag-operate na ang bag-ong Argao District Jail sa lungsod sa Argao, apan naghuot ra usab dayon ang mga piniriso.

Aduna ra unta kini 43 ka kapasidad apan sa kasamtangan, adunay 115 ka mga bilanggo ang gibilanggo dinhi.

Matod ni Malahay, nagplano usab sila magpatukod og laing jail facilities sa mga lungsod sa Barili ug Santander.

Nunot niini, nihangyo siya sa mga local government unit ug sa kagamhanan sa lalawigan sa Sugbo nga modonar og yuta aron katukoran og dugang pacilidad.

Atol sa ikaduhang quarterly meeting sa Provincial Peace and Order Council (PPOC) sa Dignitaries’ Hall sa Kapitolyo niadtong Huwebes, Hunyo 13, si Malahay nipahibawo nga niabot na og 570 porsyento ang congestion rate sa mga prisohan nga gipadagan sa BJMP 7.

Sa kasamtangan, naa sa 16,647 ka mga bilanggo ang naghuot sa 21 ka mga prisohan sa lalawigan.

Sigon ni outgoing governor ug Vice Governor-elect Hilario Davide III iduso niya kang Governor-elect Gwen Garcia ang hangyo ni Malahay.

“Dugay na kaayo na nga problema ang congestion, bisan gani sa CPDRC (Cebu Provincial Detention and Rehabilitation Center). Kuwang gyud tag jail facilities. And jail facilities even those in the towns and in cities are limited ang capacity,” pamulong ni Davide, kinsa ni-preside sa iyang katapusang tigom sa PPOC isip chairman.

Si Malahay nihangyo usab ni Davide nga modonar usab og luna ang Kapitolyo aron tukoran nila og bag-ong provincial office. Sa kasamtangan, sila nag-opisina sa regional office sa BJMP 7 sa siyudad sa Sugbo. (SCG)