ANG Department of Education (DepEd) 7 nitaho nga andam na ang 372 ka pampublikong mga tunghaan ug 10 ka pribadong mga tunghaan sa pag-apil sa proposed expansion sa limited face-to-face (F2F) classes sa Central Visayas.

Si DepEd 7 Director Salustiano Jimenez nisulti sa SunStar Cebu nga unang gitugtan nga duha ka pribadong mga tunghaan nga mao ang Sisters of Mary Schools Inc.-Boystown ug Sisters of Mary Schools Inc.-Girlstown aron pagsugod sa F2F classes sa Lunes, Nobiyembre 22, 2021.

“So far, the two schools were able to conduct the F2F smoothly and orderly. There are many schools who applied for the limited F2F from the public schools and a few from the private schools,” matod niya.

Si Jimenez niingon nga ang 372 ka public schools ug 10 ka private schools nangandam na sa expansion.

Ipahibawo pa sa DepEd ug Department of Health (DOH) kon kanus-a ipatuman ang expansion.

Wa hinuon siya mohingan kon asa kini nahimutang nga mga institusyon.

Matod ni Jimenez nga iyang gisultihan ang matag school division superintendents sa pag-andam sa tanang mga tunghaan alang sa posibleng pagpalapad sa pagpatuman sa face-to-face classes.

Niadtong Nobiyembre 15, walo ka pampublikong mga tunghaan ang gitugtan sa pagsugod sa klase sa rehiyon 7, tanan sa Lalawigan sa Sugbo.