GIBANABANANG 400,000 ka mga pasahero ang modagsa sa duha ka dagkong mga terminal sa Sugbo nga mamauli alang sa mga adlaw sa mga minatay ug mga santos.

Ang Malacañang nideklarar na nga special non-working holiday sa Nobiyembre 1 ug 2, Huwebes ug Biyernes.

Si Jonathan Tumulak, terminal manager sa Cebu South Bus Terminal, nibanabana nga moabot og 300,000 ka mga pasahero ang mohugop sa CSBT ilabi na nadungagan ang mga bus nga manukad sa terminal nga mamiyahe padung ug gikan sa Dumaguete, Negros Oriental; Tagbilaran, Bohol ug kadtong moadto sa mga siyudad sa Mandaue ug Lapu-Lapu ilabi na sa Mactan Cebu International Airport.

Matod niya, tungod kay taas ang mga adlaw sa bakasyon, ilang nalantawan nga daghan ang manguli ug managkot sa ilang tagsatagsa ka lugar alang sa adlaw sa mga santos ug mga minatay samtang ang uban manuroy sa mga tourist destination.

Si Zosimo Jumao-as, terminal manager sa North Bus Terminal, niingon nga 100,000 usab ka mga pasahero ang modagsa sa ilang terminal sud sa usa ka semana nga mamauli sa amihanang Sugbo.

Si Jumao-as pinaagi ni Tumulak, kinsa focal person on traffic management sa Kapitolyo, nihangyo sa mga local government unit (LGU) sa mga lungsod sa Daanbantayan, San Remigio, Medellin ug siyudad sa Bogo nga mopagamit sa ilang mga bus aron mohakot sa matanggong nga mga pasahero sa Oktubre 31.

Ilang nalantawan nga sa maong adlaw maoy labing tingsakay sa mga pasahero.

“Ako nagtuo nga dili idawo sa mga LGU ang ilang mga bus kay ila man ning ka tagilungsod,” sumala ni Tumulak, kinsa niingon nga libre ang pagsakay sa mga bus.

Siyam na ka mga LGU sa habagatang Sugbo ang niuyon nga mopagamit sa ilang mga sakyanan nga naglakip sa Naga, Carcar, San Fernando, Barili, Alegria, Oslob, Dumanjug, Ginatilan ug Boljoon.