SUNOG nisugat sa Pasko sa 49 ka mga lumolupyo sa Sitio Telecom, Purok Nangka, Barangay Casuntingan, Mandaue City, diin upat ka mga naugdaw sa Disyembre 25, 2020, ala 1:08 sa kaadlawon.

Matod ni FO1 John Montes sa Mandaue City Fire Station nga base sa ilang inisyal nga imbestigasyon, ilang nadawat ang alarma ala 1:08 sa kaadlawon ug gipasaka ngadto sa third alarm ala 1:21 sa kaadlawon.

Gideklara nga fire out alas 2:07 sa kaadlawn samtang P140,000 ang danyos, matod ni Montes.

Dugang niya nga nagsugod ang sunog sa ikaduhang andana sa balay ni Consita Geraldez, diin adunay nag-abang.

Apan, wa pa matumbok sa kabumberohan ang hinungdan sa sunog.

Sa laing bahin, matod ni Oscar Del Castillo Jr., kapitan sa Barangay Casuntingan, nisulti kaniya ang nag-abang ni Geraldez nga sukad pa niadtong Disyembre 24 wa sila miuli sa ilang giabangan tungod kay anaa sila sa syudad sa Lapu-Lapu misugat sa Pasko.

Depensa sa nag-abang nga ilang giibot ang tanan nga nakasaksak sa outlet sa kuryente sa ilang gi-abangan sa wa pa sila mobiya.

Matod ni Del Castillo nga gidudahan sa mga lumolupyo nga ang hinungdan faulty wiring.

Sa pakighinabi sa Superbalita Cebu ni Atty. John Eddu Ibanez, executive secretary ni Mandaue City Mayor Jonas Cortes, siya niingon nga dali ra nga narespondehan sa kabumberohan ug responders sa City Disaster Risk Reduction and Management Office (CDRRMO) ang sunog tungod kuy sila red alert.

Bisan og gama sa light materials ang mga balay, dali ra dayon kining napawong sa mga bombero tungod sa dali nilang pagresponde.

Tungod kay naugdaw ang tulo ka mga panimalay, usa ang nakan-an sa kayo, ang 16 ka mga pamilya nga nasunogan anaa nagsaulog sa ilang Pasko sa barangay gym.

Personal sab nga miduaw si Cortes sa mga nasunogan ug giapod apod ang mga hot meals ug food packs.

Aduna say madawat nga financial assistance ang mga nasunogan nga P10,000 alang sa mga naugdaw nga balay ug P5,000 sa nakan-an sa kayo. (KFD)