UNOM ka mga bike ang narekober sa kapulisan sa dakbayan sa Talisay sa ilang sunodsunod nga mga follow-up operation nga nisangko sa pagkasikop sa unom ka gikatahapang mga kawatan niadtong Dominggo sa gabii, Agusto 16, 2020.

Si Police Major Gerard Ace Pelare, hepe sa Talisay City Police Station, niila sa mga suspek nga sila si Arnel Sabroso, alyas Koke 20, taga Barangay Bulacao, Dakbayan sa Talisay ug Jhon Dave Abendar, alyas Dave, 22, taga Barangay Lawaan 3.

Samtang duna pay upat ka mga menor de edad nga mga kauban sa duha, nagpangidaron og 15,16, ug 17.

Dugang ni Pelare nga ang mga menor suguon nila ni Sabroso ug Abendar nga maoy mokuha sa bike. Kon makuha na, sundan usab kini nila ni Abendar ug Sabroso.

Sila ang gituohan nga maoy mga responsable sa mga pagpangawat og bike sa siyudad.

Tulo ka mga BMX ug tulo usab ka mountain bikes ang narekober sa mga pulis human niangkon ang mga menor de edad kon asa nila gipangtago ang mga bike. Matod ni Pelare nga didto sa usa ka balay sa Barangay Lawaan 3 gipang-ipon ang nakawat nga mga bike samtang nagpaabot og buyer. (BBT)