Mayorga, Leyte–Naluwas sa mga sakop sa Philippine National Police sa Eastern Visayas ang unom ka mga bata sa usa ka cybersex den sa lungsod.

Ang mga bata nag edad og 7 anyos ngadto sa 17 anyos samtang nasikop naman ang 23 anyos nga suspek nga kadugo ra usab sa lima ka mga biktima.

Mga ngan sa mga bata ug sa suspek gipugngan ning mantalaan base sa balaud.

Base sa inisyal nga imbestigasyon, ang mga bata gipugos sa suspek nga mohimo og law-ay nga buhat sa internet bugti sa P5,000 cash.

Toa sa abroad ang mga kustomer sa suspek.

Tungod niini, ang kapulisan sa Police Regional ug Provincial Women and Children Protection Desk uban sa Women and Children Protection Center – Visayas Field Office ug Department of Social Welfare and Development nilusad dayon sa operasyon.

Nasakmit sa mga awtoridad ang mga ebidensya sama sa daghang SIM card, memory cards ug cellphones nga gigamit sa cybersex operation.

Matod ni Police Regional Office (PRO) 8 Director, Brigadier General Ronaldo De Jesus, naa na sa kustodiya sa DSWD ang mga biktima samtang giandam na usab ang kaso batok sa suspek.

“It is bothering how some people exploit minors for some cruel purpose. Our children are to be loved and sheltered, not abused. I will see to it that the police force remains incessant against these violators who treat minors as their easy preys,” matod ni De Jesus. / JKDP