PITO ka durugista ang nasikop ug dul-an P1.4 milyon nga balor sa ginadili nga drugas ang nasakmit sa duha ka managlahing anti-drug operation nga gihimo sa kapulisan sa Dakbayan sa Talisay, Sabado sa kaadlawon, Agusto 17, 2019.

Gipahigayon ang usa ka buy-bust sa Barangay San Isidro, Dakbayan sa Talisay ala una sa kaadlawon diin nasikop ang duha ka high-value target (HVT) sa Dakbayan sa Talisay.

Ang subject sa operasyon mao si Mark Manuel Deiparine, minyo, nagpuyo sa maong barangay.

Matud sa Talisay police, si Deiparine apil sa regional drug watchlist ug mamaligyaay og dinagko nga balor sa ilegal nga drugas.

Nasikop usab sa maong operasyon si Justine Aparece, minyo, taga Dan C. Padilla, Barangay San Nicolas, Dakbayan sa Sugbo ug naapil sa listahansa mga HVT sa Cebu Provincial Police Office.

Naapil sa pagkasikop ang mga kauban nila nga silang Alvin Mercado ug si Anthony Manilag, parehong hingkod ang panuigon ug mga molupyo sa San Isidro.

Matud ni Police Captain Nazarino Emia, deputy chief sa Talisay City Police Station, nihimo sila sa operasyon human ang ilang istasyon nakadawat og sunud-sunod nga kasayuran gikan sa mga nagpakabanang residente nga kalabot sa ilegal nga kalihukan ni Deiparine.

Ang nasakmit nga gidudahang shabu giputos sa plastik sa chicheria nga adunay timbang nga 185.12 gramos ug gibana-bana nga mobalor og P1.2 milyon.

Samtang laing tulo ka mga dinakpan ang nasikop sa laing buy-bust sa Barangay Tabunok, Dakbayan sa Talisay, alas 2:20 sa kaadlawon.

Giila ang tulo nga silang Cris Wilfred Laspona, 21, Diselon Corbeta, 34, mga taga Barangay Lawaan 3, Dakbayan sa Talisay ug si Andel Cabo, 44, taga Sitio Lagtang, Dakbayan sa Talisay.

Ang tulo anaa sa drug watchlist sa Talisay City Police Station.

Gitug-an ni Emia nga gawas nga anaa sa ilang listahan ang tulo, pipila ka mga concerned citizen ang ni-report kanila sa ilegal nga kalihukan sa Barangay Tabunok.

Gipaubos sila sa surveillance sud sa pipila ka semana ug nagpositibo, hinungdan nga Sabado sa kaadlawon, gihimo ang buy-bust.

Nasakmit gikan kanila ang 25.10 gramos sa gituohang shabu nga gibana-banang mokantidad sa P170,680.

Ang pito ka mga dinakpan natanggong sa Talisay Detention Cell ug gikatakdang pasakaan og kaso Lunes, Agusto 19. (Superbalita Cebu)