ANG Land Transportation Franchising and Regulatory Board (LTFRB) 7 niingon nga 75 porsyento lang sa kapasidad sa public utility jeepneys (PUJs) ug public utility buses (PUBs) ang gitugot sa pagsugod sa pagpatuman sa modified enhanced community quarantine (MECQ) sa Dominggo, Agusto 1 ngadto sa Agusto 15, 2021.

Kini nagkahulogan nga ang PUJ nga dunay kapasidad nga 12 ka tawo, siyam lang ang iyang mapasakay nga pasahero. Samtang ang PUB nga dunay total nga kapasidad, 30 ka pasahero lang ang mapasakay.

Si LTFRB 7 Director Eduardo Montealto, Jr., sa usa ka mando sa Hulyo 31, 2021, nga ang public transport gitugotan gihapon sa mga dapit ubos sa MECQ apan gipaubsan ang kapasidad basta ang mga operator niini nakakuha og special permits to operate.

Ang Lalawigan sa Sugbo ubos sa general community quarantine samtang ang tulo ka mga highly-urbanized city nga naglangkob sa Cebu City, Mandaue ug Lapu-Lapu ubos sa MECQ sa 15 ka mga adlaw.

Si Montealto niingon nga kinahanglan nga motuman ang mga pasahero sa gintang nga tag usa ka lingkuranan ug kinahanglan nga way magbarog sa sulod sa PUJ ug PUB. (WBS)