NIAY maayong balita alang sa mga Talisaynon, labina niadtong nagtrabaho sa may IT Park.

Si Talisay City Mayor Gerald Anthony “Samsam” Gullas, Jr. nipahibawo nga naa nay mga bus nga mobiyahe gikan sa Tabunok padung sa IT Park.

Ang mga bus nga anha manukad sa Alturas Tabunok motadlas sa mga dapit sa kinapusoran sa Cebu City paingon sa IT Park. Ang Tabunok-IT Park dunay pletihan nga P35. Ang minimum nga pletihan P11.

Dunay walo ka mga bus nga temporaryong mobiyahe.

Apan nanghinaut si Gullas nga tugtan usab sa Land Transportation Franchising and Regulatory Board (LTFRB) sa pagbiyahe ang mga traditional jeepney uban sa mga bus.

“I have already expressed my desire to LTFRB that while I’m happy that naa nay new route, kuwang ghapon ni. Hopefully they will allow smaller PUJ’s mudagan usab to complement this, even the traditional ones. Actually ang dako na bus gyud unta ang padaganon nila but we requested medium buses lang para dili mag huot sa N Bacalso,” matod ni Gullas sa iyang Facebook post.

Ang mga bus motadlas sa Natalio Bacalso Avenue, moliko pawala sa Osmeña Boulevard, moliko ngadto sa Escario st. dayon, moliko pawala sa Gorordo Avenue padung ngadto sa Lahug, agi sa JY Salinas Drive, USPF ug ngadto mosulod sa IT Park. (BBT)