ANAA sa 80 ka mga istruktura duol sa Mambaling underpass sa Cebu City ang i-demolish na unya kon magsugod ang Department of Public Works and Highways (DPWH) Central Visayas sa pagtrabaho sa P16.7-million nga road widening ug drainage system project.

Si DPWH 7 Director Edgar Tabacon niingon nga aduna nay writ of possession ang mga istruktura nga naa sulod sa 200 ka metro nga yuta subay sa underpass.

Matod ni Tabacon nga itakda na unya dayon nila ang pag-demolish sa mga estruktura kon mobiya na ang mga nanag-iya sa mao nga properties.

Si Dean Padoga, DPWH in-charge sa road-right-of-way (RROW) acquisition, niingon nga lain-lain nga istruktura ang maapektuhan sama sa residensyal ug komersyal nga buildings.

Matod ni Padoga nga bisan nakakuha na sila sa writ of posesssion para sa apektadong mga istruktura, wa pa kini na-serve tanan sa korte.

Mga katunga pa niini nga na-serve, matod niya.

Matod ni Tabacon nga kon mapalapdan na ang karsada sa dapit, isunod dayon pagtukod ang drainage system nga maoy solusyon sa pagbaha sa mao nga dapit.

Tungod sa pagbaha sulod sa tunnel niadtong Marso 31, ni-deliver og privilege speech si Cebu City Councilor Jerry Guardo niadtong Abril 7 nga nag-imbitar sa DPWH 7 ug City Engineering Office ug represante para sa pag-update sa mga proyekto alang sa lugar.

Apan nisugyot sa Konsehal Alvin Dizon ug Vice Mayor Michael Rama nga inter-agency meeting na lang ang pagahimuon para matutokan ang pag-discuss niini. (JJL)