PORMAL na nga nilingkud sa konsehal sa dakbayan sa Talisay si Lester Daan, human kini nihurar kagahapon, Miyerkules sa buntag, Oktubre 16.

Nipapanumpa kaniya ang pangulo sa Alayon Party nga si Ist District Representative Eduardo Gullas sa Ciy Hall sa Talisay. Dali nga kaduolan ug motabang, kini ang kaniadto nga usa sa mahulagway sa kadaghanan sa nitaliwan na nga Talisay City councilor Julian ‘Teban’ Daan.

Mao usab ang buot nga sundon karon sa ikaduha nga anak nga si Lester Daan, human nga hingpit nga konsehal,

Giangkon ni Lester nga bisan kon usa siya sa koyug-koyug sa iyang amahan kaniadto sa panerbisyo, gikinahanglan pa niya ang tun-an pag-usab kon unsa nga komitiba ang gipangamahanan ug nasakop kini ug ang mga programa nga nasugdan na.

Apan iyang gipaneguro nga abli kanunay ang iyang buhatan, alang sa kang bisan kinsa nga Talisaynon nga nagkinahanglan sa tabang.

“Daku gyud ning hagit para nako, kay mao amn gud ni ang (importante) kang papa, ang legasiya ba, unsa gani mga nabuhat magpabilin kini ug ako padayunon ug improve pa,” asoy ni Lester Daan.

Ning hingpit na nga napulihan ang numero unong’ konsehal sa Talisay City, kompyansa ang mayor nga dugang kalambuan pa alang sa Talisay ang mahatag ni Daan.

Nadawat nila ang rekomendasyon gikan sa pangulo sa Nacionalista Party, Manny Villar alang sa pagtudlo kang Lester nga hulip sa amahan, niadtong Oktubre 14.

Dali ra usab kini nga giuyonan ni gobernador Gwendolyn Garcia.