Usa ka unsolicited proposal ang giduso sa Australian nga kompaniya alang sa pagtukod og modular nga waste to energy facility (WTE) aron malimpyo ang gatusan ka libo ka toneladang basura sa kanhi Inayawan landfill nga way gasto ang Cebu City Government.

Kini ang unod sa proposal sa NRG Group Australia pinangulohan sa ilang executive director nga si Anthony Aucone, kinsa nibisita sa Cebu City Hall.

Ilang gihatagan og kopya sa ilang proposal silang Mayor Michael Rama, Bise Mayor Raymond Alvin Garcia ug tanang mga sakop sa City Council sa Disyembre 5, 2022.

Ang NRG Group Australia mobubo og 1 million US Dollars alang sa ilang tukuron nga planta ug sulod sa usa ka tuig sa higayon nga mapirmahan na ni Rama ang joint venture agreement mosugod sila sa operasyon.

Matud pa ni Ancoune nga molanat og pito ka tuig ang paglimpyo sa 15 ektaryas nga kanhi landfill aron pagproseso sa basura pinaagi sa pyrolysis para maka-produce og bio-diesel. (PAC)