PATAY diha-diha ang usa ka 37 anyos nga babaye nga nagmotorsiklo human maguyod sa nagsunod nga wingvan sa Cebu South Coastal Road (CSCR) sa Barangay Cansojong, Dakbayan sa Talisay pasado alas 6 sa gabii sa Lunes, Hulyo 27.

Ang biktima nga nagmaneho sa iyang motorsiklo giila sa kapulisan nga si Ivy Estañero, 37,minyo, lumolupyo sa Sityo Laray, Barangay San Roque sa mao nga dakbayan.

Samtang ang drayber sa wingvan giila nga si Delfin Iba, 43, taga Barangay Maguikay, Siyudad sa Mandaue.

Matod ni Police Major Gerard Ace Pelare, hepe sa Talisay City Police Station, sila si Estañero ug Iba puro nagsubay sa samang lane.

Sa pagtabok na nila sa mga eskina sa dalan Rabaya ug CSCR, nasaghiran sa wingvan ang motorsiklo nga gimaneho ni Estañero nga miresulta sa pagkaguyod niya og pipila ka mga metros.

Dugang ni Pelare nga tungod sa kakusog nga impact sa iyang pagkaguyod sa wingvan, namatay diha-diha si Estañero.

Si Estañero paingon na unta mouli sa ilang balay nga pipila na lang unta ka metros ang gilay-on gikan sa nahitaboan.

Si Iba padulong usab sa dakbayan sa Mandaue gikan sa lungsod sa Argao.

Si Edgar Añora, residente sa lugar, niingon nga si Estañero buot unta mo-overtake sa tuo nga bahin sa wingvan, apan nasabod ang manubela sa motorsiklo.

Si Iba anaa na karon gipriso sa Talisay City Police Station samtang nagpaabot sa kaso nga reckless imprudence resulting to homicide.(BBT)