KAPULISAN sa Siyudad sa Sugbo mohimo og back ground investigation ug lifestyle check sa duha ka mga pulis nga nalakip sa drug matrix ni Rustico Ygot, giingong kanhi hinigugma ni Jocelyn Encila.

Nagduda sila nga ang duha protector sa giingong drug queen sa Sugbo hinungdan nga milambo ang ilegal nga negosyo niini.

Usa kanila nahibaw-ang dunay daghang mga kabtangan.

Giparelibohan na sa katungdanan ang pulis nga unang gikarelasyon ni Encila nga nadestino sa usa ka police station sa Cebu City Police Office ug gibalhin sa Police Regional Office 7 (PRO) 7.

Matod ni Supt. Lorenzo Batuan, deputy director for operations sa CCPO, nga ilang ipaubos sa background investigation ang pulis, lakip na ang lifestyle check tungod sa pagtuo nga nahimong protector sa ilegal nga kalihukan ni Encila.

Si Batuan niingon nga nihatag na sa iyang habig ang usa sa mga pulis, nga nagranggo pa og Police Officer 3, kanhi team leader sa usa ka police station sa siyudad sa Sugbo.

Apan matod ni Batuan nga kon mamatud-an nga aduna silay kalambigitan, mahimo sila nga mapasakaan og kasong administratiba nga posibling ikataktak sa serbisyo.

“Ang Cebu City Police Office mohimog imbestigasyon ani nila ug mo validate. If makita nga sad-an, corresponding action will be instituted against said personality,” matod ni Batuan.

Ang hepe sa kapulisan sa probinsya sa Sugbo, Sr. Supt. Manuel Abrugena, moabag sa Police Regional Office (PRO) 7 sa ilang imbestigasyon.

Matod niya nga dako ang posibilidad nga ang paglambo sa ilegal nga drugas ni Jocelyn tungod sa proteksyon sa mga tinugyanan sa balaod nga nahimo niya nga hinigugma.

Moabag usab sila sa pagpangita sa missing mga pulis nga kasamtangan nga hinigugma niini.

Ang maong pulis giingong nanag-iya og duha ka mga balay sa lungsod sa Consolacion ug Compostela.

Aduna pa kini farm sa sa manok sa Barangay Basak, siyudad sa Sugbo ug luho nga mga sakyanan.