GIHULAGWAY ni Cebu Archbishop Jose Palma nga balik-balik ra ang gipresentar ni Presidente Rodrigo Duterte atol sa State of the Nation Address (SONA) niini niadtong Lunes.

Matod sa arsobispo nga way bag-o nga gipresentar si Duterte ug mga basic lang kini nga gilauman na nga aksyonan sa gobyerno.

“It’s a rehash of the many programs that’s expected, from fight against corruption, poverty, all those things, which kung tan-awon, expected ba,” matod niya.

Hinuon giklaro ni Palma nga sayo pa kaayo aron modisider sa performance sa presidente.

“Ang ako lang gyud is how to implement this in a manner nga unta makaingon kita nga before he finishes his term, epektibo kaayo kay its too early to decide,” dugang ni Palma.

Usa sa namatikdan sa arsobispo mao nga way balikas o pagliko gikan sa iyang speech ang presidente, “One thing good siguro is he stick to the written speech, walay daghang mga balikas, which is to me an improvement with the usual way he would talk before the public.”

Apan pabilin nga gikwestiyon ni Palma ang pamaagi sa kasamtangan nga administrasyon sa pag-atubang sa problema sa drugas diin daghan na ang patay subay sa kampanya batok drugas.

“It’s also questionable, how can you say nga human rights without respecting life? that is a question that is post to many,” nagkanayon si Palma.

Nanghinaot hinuon ang arsobispo nga di pag-ampo apan lakip na ang nagkadaiyang ahensiya nga hingtungdan nga mahunong na kining pagpamatay nga nahitabo hilabi na karon sa Sugbo.

“Ampo lang kita even as we know, besides prayers unta there should be a response by the agencies concern to make an effort really to stop especially ang nahitabo nga killings and other sad incidents,” padayag sa arsobispo. HBL