BARANGAYANIHAN nga gipasiugdahan sa kapulisan sa dakbayan sa Sugbo magpadayon bisan sa pamahayag ni Presidente Rodrigo Duterte nga hunongon na kini tungod sa kakuyaw sa tinakdanay sa coronavirus disease.

Apan ang kapulisan niseguro nga kanunay masunod ang health protocol.

Sukad gisugdan sa miaging semana ang barangayanihan sa Police Regional Office 7, gidagsa kini sa mga tawo nga labing naapektohan ang panginabuhi tungod sa pandemic.

Daghan ang nalipay tungod kay gawas nga adunay mga kunsomo sa pamilya, aduna pay mga tambal ug bitamina nga gihatag sa kapulisan nga makapahimsog sa resistensya nga sarang maka batok sa gikahadlokan nga virus.

Apan nipagawas og pamahayag si Duterte nga dako ang posibilidad nga mosaka ang mga kaso sa Covid 19 sa nasud tungod sa gipasiugdahang community pantries kay nagkadikit na ang mga tawo.

Awhag ni Duterte niadtong way makaon nga maghuwat lang sa ilang balay ug makig-alayon sa barangay aron mahatdan og ayuda nga pagkaon dungan sa awhag sa mga barangay official nga ihatod sa ilang balay ang abag.

Apan matod ni Police Lieutenant Colonel Wilbert Parilla, deputy city director for operations sa Cebu City Police Office, nga wa pa silay nadawat nga kamandoan gikan sa ilang labaw nga hunungon ang ilang barangayanihan.

“Wala pa tay nadawat nga directive nga atoang hunongon. So, ongoing pa gihapon ang directives sa higher headquarters nga atong ipadayon ang atoang barangayanihan ayuda,” matod ni Parilla. Pasabot ni Parilla nga sukad ilang gisugdan ang community pantry, daghan na silag natabangan nga mga kabus, diin ang mga barangay ang niila kanila. (AYB)