KAGAMHANAN sa lungsod sa Barili nihatag og luna sa yuta nga dunay gidak-on nga 2,000 metro kwadrado ngadto sa kapulisan sa lungsod aron matamnan og mga utanon.

Ang luna nahimutang sa Barangay Mantalongon, usa sa mga breadbasket sa mga utanon sa Sugbo.

Si Barili Mayor Julieto Flores nga nahinabi sa Superbalita Cebu niingon nga isip ang vice chairman sa Police Advisory Council sa lungsod, iyang gisuportahan ang usa sa mga programa ni Police Colonel Alladin Collado, director sa Cebu Police Provincial Office, nga patamnon ang mga pulis og utanon kon way kalingawan kon off duty.

"Murag backyard lang ba, adto sila didto mag tanom didto og batong, talong, ug uban pa nga mga utanon," pasabot ni Flores.

Dugang sa mayor nga ang kagamhanan mismo maoy mohatag og seedlings ngadto sa mga pulis kon unsa ang ilang itanom.

Gipasabot ni Flores nga di manginlabot ang lungsod sa unsay naabot sa mga gitikad nga utanon.

"Ila na na. Dili na mi manginlabot kon unsaon nila ang mga bunga sa ilang mga tinanom," nagkanayon si Flores.

Matod niya nga mao ni ang labing unang higayon nga programa nga gihimo sa kapulisan nga ang nangu ang direktor sa kapulisan sa probinsiya.

Si Police Captain Romeo Caacoy Jr, hepe sa Barili Police Station, niingon nga ang lugar nga gipili sa mayor naa sa Barangay Mantalongon.

Matod niya nga haom kaayo ang dapit sa mga utanon nga himsog kon motubo tungod sa maayong klase sa yuta.

Dugang ni Caacoy nga ang maong programa gitawag og "There is fun in the farm" nga gipasiugdahan sa CPPO, local nga kagamhanan og advisory council. (BBT)