Point guard nga dili mamasag bola nadunggaban sa iyang kauban ug naa sa talandugong kahimtang sa alas 5:30 sa hapon, Dominggo sa Purok Dasulfa, DAS, dakbayan sa Toledo.

Si Joel Sumarago Papasin, 33, minyo, samdan sa walang bahin sa kilid sa lawas ug dughan.

Nitahan sa kapulisan si Edward Ladano Bardon, 41, minyo, silingan sa biktima.

Si Police Staff Sgt. Jonever Manabat, imbestigator sa Toledo Police Station nga nahinabi sa Superbalita Cebu, nagkanayon nga gumikan sa lalis sa duwang basketball, nadunggaban si Papasin.

Sila si Papasin ug iyang kauban sa duwa nga si Roldan Basera naglalis samtang nagduwa sa basketball.

Ang lalis sa duha nahitabo gumikan lang sa bola nga dili ipasa.

“Dili lagi daw ni mamasag bola ang biktima. Unya ang gikalalis nga kauban sa duwa di sab mamasa. Kanang sa makakupot lang sa bola diretso nag bagnos, di makakita sa kauban,” dugang ni Manabat

Gumikan sa away naundang ang duwa sa basketball.

Si Bardon nga hubog, niabot ug nipalit sa away, apan wala panumbalinga sa biktima ug sa kauban niini, nanglingkod sila sa daplin sa korte.

Si Bardon nga didto sa likod nagdala og 12-inch nga plamingko, gihansakan ang walang kilid ni Papasin. Wala pa matagbaw gihansakan pa gyud niya ang dughan sa biktima.

Hinuon nitahan sa kapulisan si Bardon ug niangkon sa kremin. Ang suspek nibutyag nga gumikan sa iyang kahubog iyang nahimo ang kremin.

Nagtuo siya nga iyang igsuon maoy gikalalis ni Papasin sanglit pareho silag kolor nga gisul-ob.

Ang biktima kasamtangang naa sa VSMMC gi-admit.

Ang suspek gipasakaag kasong frustrated murder sa Martes sa buntag.